Северна Македонија имала 20,1 професионални судии на 100.000 жители во 2024 година, покажуваат најновите податоци на Евростат.
Иако земјата останува над просекот на Европската Унија, бројот на судии постојано се намалува во последните години.
Според статистиката, во 2019 година земјата имала 24,3 судии на 100.000 жители, додека во 2024 година овој број се намалил на 20,1, што значи намалување од повеќе од четири судии на 100.000 жители.
Сличен тренд е забележан и во Европската Унија, каде што просекот се намалил од 17,7 судии на 100.000 жители во 2014 година на 15,7 судии во 2024 година.
Меѓу земјите-членки на ЕУ, Хрватска има најголем број судии на 100.000 жители со 43,3, по што следуваат Словенија со 40,2, Луксембург со 36, Бугарија со 35,4 и Романија со 35,3. На другиот крај од листата се Ирска со 3,6, Австрија со 4,3, Шпанија со 6,2, Чешка со 6,7 и Италија со 7,9 судии на 100.000 жители.
Во регионот, Црна Гора има највисок сооднос со 42,49 судии на 100 илјади жители, по што следуваат Србија со 40,18, Бугарија со 35,37, Грција со 26,06, Северна Македонија со 20,15 и Турција со 16,66. Нема достапни податоци за Албанија и Косово за 2024 година.
Податоците на Евростат, исто така, покажуваат дека жените доминираат во судскиот систем во поголемиот дел од Европа. Во Северна Македонија, 61,4 проценти од професионалните судии се жени.
Во регионот, Грција има највисок процент на жени судии со 75,5 проценти, по што следуваат Србија со 73 проценти, Босна и Херцеговина со 64,8 проценти, Бугарија со 64,4 проценти, Црна Гора со 63,3 проценти и Албанија со 55 проценти.
На ниво на Европската Унија, Словенија е водечка со 81,4 проценти жени меѓу професионалните судии, додека Германија е една од ретките земји што постигнала речиси целосна родова еднаквост во оваа професија.
Според дефиницијата на Евростат, професионалните судии се сметаат за платени адвокати кои се овластени да слушаат граѓански, кривични и други видови предмети, како и да донесуваат судски одлуки. Судиите-поротници не се вклучени во оваа категорија.
