Регулаторната комисија за енергетика донесе одлука за новите малопродажни цени на нафтените деривати, која вклучува намалување на акцизите и повластена стапка на ДДВ од 10% (освен за мазутот). Одлуката стапува на сила од ноќеска по полноќ.
Според новата одлука, максималните малопродажни цени на горивата ќе изнесуваат:
Моторен бензин ЕУРОСУПЕР БС – 95: 83,50 ден/литар
Моторен бензин ЕУРОСУПЕР БС – 98: 85,50 ден/литар,
Дизел ЕУРОДИЗЕЛ БС (Д-Е V): 98,00 ден/литар
Масло за горење Екстра лесно 1 (ЕЛ-1): 95,50 ден/литар
Мазут М-1 НС: 51,311 ден/килограм
Со оваа одлука, малопродажните цени на нафтените деривати се зголемуваат во просек за 1,41% во однос на претходната одлука од 30 март 2026 година. Од Регулаторна укажуваат дека зголемувањето на светските референтни цени и на курсот на денарот би довело до повисоки цени доколку не беа интервенциите на Владата за намалување на акцизите и ДДВ-то.
Регулаторната комисија дополнително ги повика нафтените компании да го вкалкулираат обезбедениот попуст од страна на Владата со главниот добавувач ОКТА, со што граѓаните ќе можат директно да го почувствуваат ефектот: поевтинување од 3 ден/литар за дизел и 2 ден/литар за бензин.
– Доколку не се продолжеше времетраењето на намалениот ДДВ и не се интервенираше во акцизата, цената на бензините ќе беше повисока за 8,50 ден/литар, а дизелот за 12,00 ден/литар – потенцираат од РКЕ и велат дека интервенцијата овозможува поевтини горива и стабилност на пазарот.
Намалувањето на цените е дел од мерките за заштита на стандардот на граѓаните и стабилноста на економијата во услови на глобални флуктуации на нафтениот пазар.
Регулаторната комисија ја донесе одлуката согласно владината одлука за намалување на акцизите.
– Овозможивме Регулаторната комисија да ги намали акцизите за дизел од 4 денари по литар, а за бензините од 2 денари по литар. Исто така, во разговор со ОКТА, успеавме да обезбедиме дополнителен период од еден месец за попустот од 3 денари за дизел и 2 денари за безоловен бензин. Кога сето ова ќе се стави во функција, за бензините треба да имаме поевтина цена, а за дизел не би требало да имаме покачување на одредени бензински пумпи, и покрај сериозната предизвикувачка состојба во државата – истакна Мицкоски.
Премиерот нагласи дека состојбата со резервите на гориво е стабилна.
– Од аспект на количини сме стабилни. Потрошувачката се зголеми од 1,5 милиони литри на 2 милиони литри на ден. Имаме притисок од пограничните места. Ја продолживме мерката за ДДВ од 18 на 10 проценти, со цел да го заштитиме стандардот на граѓаните и бизнисот – изјави Мицкоски.
