Бугарскиот премиер Румен Радев смета дека убиствата на познати бизнисмени би можеле да продолжат и во иднина. Тој најави дека ќе се спротивстави на барањето на претседателката Илијана Јотова за оставка на директорот на Националната служба за обезбедување (НСО), по инцидентот со новинарката Соња Колтуклиева.
Радев ова го изјави пред новинарите во неделата, откако гласаше на претседателските избори.
Во саботата беше убиен бизнисменот Слави Бинев, а еден месец претходно и бизнисменот Илијан Филипов. Двајцата се познати личности од таканаречениот период на транзиција во Бугарија, односно преминот од тоталитарен социјализам кон демократија во 1990-тите години.
„Постои можност ваквите убиства да продолжат и во иднина, бидејќи олигархијата и подземјето ја губат контролата врз јавните набавки и финансиските текови во државата“, изјави Радев.
Според него, станува збор за „прераспределба на пари“.
Истражните органи засега ги третираат убиствата како дела поврзани со лични и финансиски спорови. Во саботата, главниот секретар на бугарското Министерство за внатрешни работи, Љубомир Николов, изјави дека главната верзија за убиството на Слави Бинев е поврзана со нерешени финансиски односи со тројцата приведени осомничени.
Во случајот со убиството на Илијан Филипов, надлежниот обвинител Димитар Молев како мотив го посочил личниот конфликт произлезен од нерешени финансиски односи.
„Во годините на транзицијата, овие убиства одекнуваа во јавноста, но не само што не беа расветлувани, туку сторителите беа прикривани од полицијата и државата. Сега работите се сосема поинакви“, рече Радев.
Осомничениот за убиството на Филипов бил уапсен за помалку од 24 часа, додека осомничените за убиството на Бинев биле приведени во рок од еден час.
