Десетмина мажи кои биле киднапирани се пронајдени мртви на три локации во мексиканската држава Сакатекас. Меѓу жртвите се поранешен градоначалник, двајца градски службеници, пожарникар, и неколку локални претприемачи, пренесе порталот Б15.
Најстрашната сцена била во саботата, во близина на Позо де Гамбоа во општината Пануко, каде што пет полуголи тела со траги од мачење виселе од мостот. Четири тела биле оставени на влезот во градот Морелос, а едно било пронајдено покрај патот помеѓу Саин Алто и Сомбререте.
Обдукциите покажале дека осум мажи починале од задушување, додека двајца биле убиени од огнено оружје. Обвинителството, исто така, објави дека токсиколошките наоди на петте жртви покажале траги од неодамнешна консумација на дрога, но сè уште не е објаснето дали оваа информација има некаква врска со мотивот за убиствата.
Мажите биле киднапирани во различно време во текот на викендот. Властите тврдат дека не е добиена официјална пријава за исчезнато лице пред да биде пронајдено телото, иако семејството и пријателите на најмалку една жртва побарале помош на социјалните мрежи.
Повеќето од жртвите биле поврзани со Фресниљо, еден од економските центри на Сакатекас. Меѓу нив се Фидел Алварадо де ла Торе, раководител на одделот за социјален развој на градот, и Хесус Херардо Муњетон Хернандез, вработен во противпожарната служба и цивилната заштита.
Градот Фресниљо се збогува со нив, опишувајќи ги како ефикасни, пријателски настроени и исклучително посветени вработени.
Убиени се и Армандо Ледезма Агире и неговиот син Хозе Армандо Ледезма Кампос, претприемачи поврзани со рударство, транспорт на вода и гориво и градежништво.
Меѓу жртвите е и поранешен градоначалник
Една од жртвите е Игнасио „Начо“ Кастрехон Валдез, архитект, претприемач и поранешен градоначалник на Сомбререте. Тој го водеше градот од 2016 до 2018 година.
Меѓу убиените се и сопственикот на бар и диџеј Хуан Карлос Берумен Гереро, организаторот на настанот Хесус Даниел Ривера Сандовал и Фернандо Роблес де ла Торе, претставник на градежната компанија „Роблес Херманос“.
Хозе Анхел Валдез Ривера бил земјоделец и претставник на сточари од општината Хименез дел Теул. Неговото семејство јавно го објави неговото исчезнување на социјалните мрежи, наведувајќи дека последен пат бил виден на 17 јули во градот Каноас.
Десеттата жртва, Андрес Васкез Гурола, бил адвокат, поранешен локален службеник и поранешен раководител на јавната безбедност во општината Канатлан во соседната држава Дуранго.
По масакрот, уапсени се пет лица
За време на операциите започнати откако беа пронајдени телата, уапсени се пет лица. Последно биле приведени двајца мажи на возраст од 22 и 23 години и едно 16-годишно девојче.
Кај нив се пронајдени дрога, контејнери за автоматско оружје, балистички елеци, метални направи за пробивање автомобилски гуми и возило со изменети идентификациски ознаки.
Властите велат дека тие можеби припаѓаат на криминална група поврзана со неодамнешното насилство во Фресниљо. Сепак, не е потврдено дека некој од петмината уапсени бил директно вклучен во киднапирањата и убиствата.
